Манчестер сити продолжува да се соочува со тешка криза во форма, а утрешното градско дерби против Манчестер јунајтед на „Етихад“ се приближува во исклучително сложени околности за актуелниот шампион на Англија.
Пеп Гвардиола, на прес-конференција потврди дека тимот е значително ослабен во дефанзивата поради повреди. Надвор од конкуренција се Мануел Аканџи, Џон Стоунс и Нејтан Аке, додека Рико Луис нема да настапи поради суспензија.
Pep Guardiola: “Against United maybe Matheus Nunes can play as a FULL-BACK! Or maybe five at the back, I’m thinking…” ⚠️ pic.twitter.com/meb8hYYq5o
— City Report (@cityreport_) December 13, 2024
Во ваква ситуација, Гвардиола на располагање ги има само Јошко Гвардиол, Рубен Дијаш и Кајл Вокер за дефанзивната линија. Ова го принудува да размислува за нетипични решенија, вклучително и ангажирање на офанзивен играч во дефанзивата.
„Против Манчестер јунајтед, најверојатно Матеус Нуњес ќе игра во одбраната. Сè уште не сум сигурен дали ќе биде класичен лев бек или ќе игра како фул бек во формација со пет дефанзивци. Размислувам за најдобрата опција“, изјави Гвардиола.
Нуњес, кој е природно крилен напаѓач, може да биде клучната фигура во експерименталниот пристап на Гвардиола, кој ретко применува систем со пет дефанзивци.
Дербито ќе биде тест не само за формацијата на Сити, туку и за нивната способност да се прилагодат на околностите и да го прекинат сериозниот пад во формата.
