Менаџерот на Манчестер сити, Пеп Гвардиола, остро ја критикуваше Премиер лигата откако челниците на лигата го одбија предлогот за поместен почеток на следната сезона поради Светското клупско првенство што ќе се одржи во САД од 15 јуни до 13 јули 2025.
Новиот шампионат во Англија ќе започне според првичниот план – на 16 август, што значи дека доколку Сити стигне до финалето на клупскиот Мундијал, ќе има само еден месец одмор пред стартот на следната сезона.
Гвардиола ја изрази својата фрустрација нагласувајќи дека ваквиот распоред не е во интерес на фудбалерите и на клубовите.
„Ова не е хумано. Доаѓаме до ситуација во која клубовите ќе мора да имаат по 40-мина фудбалери на платен список за да можат да ги издржат сите натпревари. Луѓе, тоа се 40 плати! Не знам кој клуб може да го издржи тоа. Ова ќе ги води клубовите кон банкрот. Ова не е добро за фудбалот“, изјави Гвардиола.
По убедливата победа над Њукасл, Манчестер сити изби на четвртото место во Премиер лигата, а веќе во среда ги чека тежок реванш против Реал Мадрид во плејофот за осминафинале во Лигата на шампионите.
Реал победи со 2-3 на „Етихад“, па тимот на Гвардиола ќе мора да брка резултат на „Сантијаго Бернабеу“ ако сака да остане во елитното европско натпреварување.
