Пеп Гвардиола во пресрет на дуелот од Лигата на шампионите помеѓу неговиот Манчестер сити и Динамо Загреб, за когошто игра македонскиот репрезентативец Аријан Адеми, рече дека познава само еден играч на Модрите, а тој не е капитенот Адеми.
„Граѓаните“ ќе бидат огромни фаворити на мечот на стадионот „Етихад“, но Динамо со победата од 4-0 над Аталанта на стартот на сезоната покажа дека е многу опасен.
„Победата на Динамо над Аталанта не е изненадување за мене, во ЛШ нема слаби екипи. Сум играл на нивниот стадион против Хрватска, навивачите им се неверојатни. Динамо е голем клуб во Хрватска и мора да бидеме фокусирани ако сакаме победа. Знам само еден нивен играч, Олмо, но ќе ни биде тешко. Олмо во минатото беше во академијата на Барселона. Таму сите се добри. Тој реши да игра во Хрватска, има работни навики и засега делува совршено. На младинското ЕП беше меѓу најдобрите“, изјави Гвардиола.
