Тренерот на Манчестер сити, Пеп Гвардиола изненадувачки, се пожали на условите кои ги има клубот во кој работи. Шпанскиот стратег е незадоволен од тоа како изгледа тревата на стадионот „Етихад“ и потенцираше дека Граѓаните имаат многу полош терен, од терените кои ги има на другите стадиони во Англија.
Водечкиот тим во Англија утре ќе гостува кај Фулам во Лондон, а потоа му претстои период во кој за 11 дена ќе одигра четири меча на свој терен. Иако тревата на „Етихад“ е лоша, сега нема период кога таа да биде сменета.
„Знам дека атмосферските услови во Англија се лоши за терените, но тука има стадиони на кои тревата е многу подобра од тоа што ние го имаме на нашиот стадион. Бевме во Лондон играме против Арсенал, игравме на „Енфилд“, па дури и тревата на „Олд Трафорд“ е подобра од таа на нашиот стадион. Во Будимпешта на „Пушкаш арената“ тревата е неверојатна и изгледа како тепих“, се пожали Гвардиола, кој додаде дека Фулам е опасен тим и дека лондончани сигурно ќе сакаат да освојат бодови во борба за опстанок.
Во претходното коло Фулам го направи најголемот изненадување откако со 1:0 славеше на „Енфилд роуд“ против Ливерпул, но уште е во зоната за испаѓање со 26 бода.
