Манчестер сити одигра блескав меч и убедливо со 4:0 го победи Њукасл, иако тоа требаше да биде дерби во Премиерлигата. Двата тима имаа по 41 бодови и се очекуваше да биде неизвесно, но Сити со одлична игра во првото полувреме стигна до 3:0, а во вториот дел домаќините постигнаа уште еден гол за висока победа и пласман на Граѓаните во Топ 4 на табелата.
„Начинот на кој игравме ни помогна да се потсетиме кои сме. Не можевме да се пофалиме со тоа претходно оваа сезона. Секогаш се обидуваме, но понекогаш не успеваме. Многу сум задоволен од темпото и интензитетот што го покажавме во нападот. Нико Гонзалес и Хусанов беа одлични. Мораме да ги добиваме овие натпревари за да обезбедиме место во Лигата на шампионите. Мораме да играме на начин кој ќе ги направи нашите навивачи среќни“, задоволно коментираше Гвардиола.
Оваа победа на Сити доаѓа во вистинско време за да се крене самодовербата кај фудбалерите пред реваншот против Реал Мадрид во нокаут-фазата за пласман во осминафиналето во Лигата на шампиони. Сити на првиот меч на свој терен загуби со 2:3, што значи дека е потребно да победи на гости во Мадрид, ако сака да остане во елитното натпреварување на УЕФА.
