Менаџерот на Манчестер сити, Пеп Гвардиола, го пофали резервниот фудбалер Савињо за тоа што внесе искра во тимот и помогна во спасувањето на сезоната во Лигата на шампионите откако англискиот клуб славеше со 3-1 против Клуб Бриж.
Сити изгледаше како да е пред елиминација од групната фаза за првпат од сезоната 2012/13, откако губеше со 0-1 на домашен терен, но со три гола во второто полувреме стигна до пресврт и победа. Савињо го постигна третиот гол за Граѓаните.
Драмата околу натпреварот започна со евакуација на дел од стадионот, кога избувна пожар на штанд за продажба на навивачки реквизити во близина на главниот влез.
„Кога го видов пожарот пред натпреварот, на полувреме си помислив дека новинарите веќе ги имаат своите наслови – тоа е сигурно. Бевме загубени. Бевме елиминирани. Но, во вакви ситуации немаш што да изгубиш“, изјави Гвардиола.
„Во првото полувреме ни недостасуваше енергија. Мислам дека Савињо ни помогна. Како и во текот на целата сезона, кога играше на таа позиција, беше неверојатен. Тој го промени натпреварот“, додаде шпанскиот стратег.
„Би рекол дека не ми се допаѓа новиот формат на Лигата на шампионите затоа што премногу страдаме. Ова е огромна лекција за мене и за играчите – ништо не е загарантирано“, истакна Гвардиола.
На прашањето дали верува дека неговиот тим може да го повтори успехот од 2023 година, тој одговори:
„Во моментов? Не. Ако требаше да играме утре, ќе беше тешко. Но, не знам во каква форма ќе бидеме за две недели. Играчите во соблекувалната велеа ‘Баерн или Реал’. Сè е во ред. Ќе се подготвиме добро и ќе бидеме во топ-форма. Ќе пробаме и ќе видиме што ќе се случи.“
Иако можната пресметка со Реал Мадрид или Баерн Минхен изгледа застрашувачки, Гвардиола смета дека откако тимот успеал на ваков начин да обезбеди пласман во следната фаза, нема право да очекува полесен пат.
„Се соочивме со илјадници проблеми. Но, заслужено сме тука. Ако одигравме подобро, можеби ќе имавме повеќе среќа. Не знам дали другите тимови се радуваат што ќе играат против нас, но тоа е ситуацијата“, заклучи Гвардиола.
