Менаџерот на Манчестер сити, Пеп Гвардиола, се огласи по објавата дека белгискиот играч за врска Кевин де Бројне ќе го напушти клубот на крајот од сезоната. Во својата изјава шпанскиот стратег не ја криеше тажната емоција истакнувајќи дека денот кога е објавена оваа вест е „многу тажен ден“ за целиот клуб.
„Ова е многу тажен ден. Но, од друга страна, среќен сум што имав чест да го водам и да ги споделам сите овие неверојатни моменти со него. Тој ни даде сè – со својата скромност, работна етика и огромниот придонес за сите успеси што ги постигнавме во последната деценија. Без него, тие не би биле можни“, изјави Гвардиола.
🎙️| Pep Guardiola on De Bruyne:
— City HQ (@City_HQs) April 4, 2025
“It’s not necessary to tell his success with us in the last decade – impossible to imagine without him. A sad day because a part of us is leaving…”
“He will get the love and recognition from all of us that he deserves…” 🗣️🩵
📰 via @ManCity pic.twitter.com/Gk9iEoW59a
Шпанецот додаде дека му претстојат уште десет, а можеби и единаесет натпревари со Сити, во кои се надева дека Де Бројне ќе добие заслужена почит и љубов од навивачите.
„Прочитав дека има учество во 280 гола и асистенции во Премиер лигата. Такво нешто заслужува восхит. Иако треба да се има респект кон сите големи фудбалери во последните 20–30 години, нема сомнеж дека тој е еден од најдобрите. Освен последната година со повредите, неговата конзистентност и присуство во клучните моменти беа феноменални“, рече менаџерот на Манчестер сити.
Гвардиола подвлече дека Де Бројне оставил неизбришлива трага во клубот.
„Неговите асистенции, голови, визија – тешко е да се најде некој што може да го замени. Тој беше клучен дел од сите трофеи што ги освоивме. Клубот му порача дека вратата ќе му биде секогаш отворена, без разлика што ќе одлучи понатаму. Тој е дел од семејството на Манчестер сити“, истакна Шпанецот.
Гвардиола откри дека ја знаел одлуката на играчот неколку дена, но не прецизираше дали Де Бројне ќе настапи на Светското клупско првенство.
„Тоа е добро прашање. Не знам. Сè зависи од него и од договорот. За првите три меча има договор до 30 јуни, но ако продолжиме, не е сигурно. Ќе мора клубот да разговара со него“, заврши Гвардиола.
