Напаѓачот на Манчестер сити, Ерлинг Халанд, вчера доби уште една награда, Европската фудбалска федерација (УЕФА) го прогласи за фудбалер на годината за минатата сезона. Тој изјави дека награда не е поради неговиот талент, туку е плод на напорна работа.
„Не знам дали воопшто сум роден со талент, всушност не мислам дека бев талентиран како млад. Но, многу напорно работев. Го сакав ова чувство и затоа го работам тоа го работам“, изјави Халанд.
Напаѓачот кој со Сити минатата година ја освои тројната круна, триумфира во Лигата на шампионите, во Премиер лигата и во ФА Купот, смета дека сезонава ќе биде уште подобар.
„Пред да дојдам во Сити и во Премиер лигата, работев со тренерите на тоа што сакав да го подобрам. Имам уште многу да учам и можам да станам уште подобар. Млад сум и среќен сум поради тоа. Се наоѓам на перфектно место за развој, тимот на Пеп Гвардиола работи неверојатно на тоа поле и среќен сум што можам да се развивам како играч“, додаде Халанд.
