Хјустон рокитс беше подобар од Шангај шаркс со 128:86 во мечот на којшто во победничкиот тим најдобар беше Џејмс Харден со 37 поени и девет асистенции. Кармело Ентони не влезе во игра. Кај кинескиот тим, најдобри беа ексиграчот на НБА Џимер Фредет со 41 поен, и 38-годишниот Луис Скола со 18 поени и 12 скока. Аргентинецот Скола е поранешен играч на Хјустон (пет сезони играше за нив).
Лос Анџелес клиперс го победи Денвер нагетс со 109:103, а Оклахома сити тандер по продолжението го совлада Милвоки бакс со 119:115 во другите две синоќешни контролни средби од претсезоната во НБА-лигата.
На дуелот помеѓу Оклахома и Милвоки, на 21,5 секунди до крајот на дополнителниот период, Бартон погоди тројка за 118-115 и на „громовите“ им донесе победа.
Клиперс до победата над „грутките“ дојде благодарение на европскиот тандем Галинари-Марјановиќ. Теодосиќ имаше скромна статистика, а Јокиќ од Денвер играше 12 минути, сосема доволно за Србите да се пофалат дека имале тројца претставници на паркетот.
