Барселона го купи Роберт Левандовски пред три години од Баерн Минхен за сума од 45 милиони евра, а неговиот договор истекува следното лето. Иако пристигна како 34-годишник, сепак вложените средства и тоа како ги оправда, па на 148 натпревари постигна 101 гол, а имаше и 20 асистенции.
Сепак, со оглед на возраста, Барселона мора да размислува за иднината, а таа повторно ја гледа во Баерн Минхен. Хари Кејн има уште две години од договорот со „баварците“, но Барселона веќе во него гледа замена за Роберт Левандовски.
Шпанските медиуми пренесуваат дека раководството на „каталонците“ ќе се обиде да го купи следното лето, но ако не успеат, тогаш ќе чекаат да истече неговиот договор, па да го добијат бесплатно.
Хари Кејн во моментов има 32 години, па за две години би имал 34, колку што имаше и Левандовски кога пристигна на „Камп Ноу“. Англичанецот за Баерн Минхен одигра 100 натпревари, со ефект од 91 гол и 28 асистенции.
