Штутгарт е „решен“ да го освои првиот трофеј во сезоната во мечот против Баерн Минхен за Суперкупот на Германија в сабота.
„Баерн е еден од најдобрите тимови во Германија, но ова е само еден натпревар и ќе се игра на нашиот стадион. Решени сме да го подигнеме трофејот“, изјави тренерот Себастијан Хенес на прес-конференцијата.
„Не треба да имаме надеж дека Баерн ќе дојде во Штутгарт во слаба форма поради покусите подготовки“, предупреди тој.
Голманот Александар Нубел ќе го пропушти мечот поради повреда на рамото, додека Анџело Штилер е во форма откако ја излекува повредата на глуждот во текот на летото, откри тренерот.
Штутгарт го освои Купот на Германија минатата сезона и сега ќе се соочи со шампионот Баерн. Надвор од теренот продолжува приказната за евентуалниот трансфер на Ник Волтемаде од Штутгарт во Баерн.
Швабите досега одбија две понуди за напаѓачот од Баерн, при што втората беше вредна 55 милиони евра. Штутгарт сака најмалку 65 милиони за Волтемаде за да седне на преговори.
„Ник е дел од нашиот тим. Тој е многу, многу важен елемент“, додаде Хенес.
