Шведскиот напаѓач Златан Ибрахимовиќ рече дека нема да се пензионира додека не освои трофеј со Милан.
Златан во октомври ќе наполни 41 година, одамна е ветеран, но не планира да престане со активно играње фудбал додека не крене уште некој трофеј.
Милан од 2016 година, кога го освои Суперкупот на Италија, не знае за освојување на пехар. Серија А не ја освоиле уште од 2011, кога исто така Ибрахимовиќ беше во нивниот состав. Сезонава Милан е еден од кандидатите за Скудетото, но често киксираат на мечеви кои мора да ги добијат.
„Жал ми е што не можам да играм, тоа многу ме боли, особено што на тимот добро му оди и сакам да помогнам. Откако се вратив во Милан, ни фалат само трофеи. Нема да се откажам додека не освоиме нешто“, порача Ибра, кој има договор до јуни, а нема играно во 2022 година поради повреда.
