Ница се мачи на стартот од сезоната во Лига 1, по три кола бележи само два освоени бода, а претходно денес го претрпи и првиот пораз и тоа со минимални 1-0 на гостувањето кај Клермон.
Поразот беше неминовен откако гостите ги одиграа последните десетина минути со само девет фудбалери на теренот, по двете исклучувања на Лемина и Тодибо во период од 120 секунди.
Прво играчот за врска грубо стартуваше врз противнички играч, по што Лемина доби директен црвен картон во 80-тата минута. Отприлика на истиот дел од теренот, неполни две минути подоцна, Тодибо неконтролирано реагираше не прифаќајќи ја одлуката на арбитарот, ја зеде топката и нервозно ја фрли, по што доби втор жолт картон па и тој замина на рано туширање. Сето ова се случуваше при водство на Клермон, до кое дојде уште во шестата минута преку Кајуи.
