Естонскиот фудбалер Рагнар Клаван вечерва беше во главна улога на државната телевизија на оваа балтичка земја откако беше човекот кој ги читаше резултатите од естонското жири на Евровизија. Тој е поранешен репрезентативец на Естонија со 129 настапи и три гола за државниот тим.
Најпознат е по периодот од 2016 до 2018, кога настапуваше за Ливерпул, местото каде што се одржува овогодишното издание на Евровизија. За Црвените настапи на 39 натпревари и постигна еден погодок.
Клаван во својата кариера настапуваше за естонските Елва, Тулевик, Флора и Паиде, кој воедно му е и последен клуб, додека интернационална кариера освен во Ливерпул, градеше во холандските АЗ Алкмар и Хераклес, норвешката Волеренга, бундеслигашот Аугсбург и членот на Серија А, Каљари.
