Барселона направи голем гаф со објава на социјалните мрежи дека ги очекува меч во Букурешт, Романија, против унгарскиот Ференцварош, кој ги чека на гости задутре во Будимпешта, на „Групама арената“ во меч од петтото коло во Лигата на шампионите.
Објавата е на официјалниот клупски налог на „Твитер“ и предизвика многу коментари, а и сеирот е голем бидејќи е утнат градот во кој Барса во среда од 21 часот ќе игра против Ференцварош.
Добро е за Каталонците што, сепак, нема да утнат и ќе слетаат во Будимпешта, наместо во Букурешт како што објавија.
Барселона веќе го обезбеди пласманот во нокаут-фазата, има максимален учинок од четири победи и 12 бода во групата Г и заедно со Јувентус веќе се осминафиналисти во Лигата на шампионите, па задутре ќе играат меч без преголемо значење за нив.
