Португалската полиција со дозвола на португалското обвинителство започна голема акција во фудбалот, поради сомнение дека се „переле пари“. Запленети се голем број договори за застапувања на фудбалери, како и договори од трансфер на играчи. Истрагата ќе биде од меѓународен карактер затоа што е побарана соработка и од обвинителствата во Шпанија, Англија и Франција.
Полициската акција го носи името „Офсајд“, а засега се вклучени околу 300 полицајци кои досега пребарале вкупно 76 објекти, меѓу кои се 40 домови и пет адвокатски канцеларии. Истражителите ги прегледуваат договорите на фудбалерите и клубовите потпишани во последните пет години.
Претресени се и домовите на претседателите на португалските гиганти Спортинг, Порто и Бенфика, а полицијата влезе и во домот на легендарниот голман Икер Касилјас.
„Утрово државното обвинителство дојде во мојот дом, како и во 76 останати објекти и ми побара документација. Им ја дадов целокупната документација на располагање. Транспарентноста е еден од моите принципи“, напиша Касилјас на „Твитер“. Голманот кој 15 години беше во Реал Мадрид направи трансфер во Порто во 2015 година, а сега најавува дека сака да биде и кандидат за претседател на Шпанската фудбалска федерација.
Под истрага е и еден од најпознатите фудбалски менаџери, Жорж Мендеш, кој во својата агенција има ѕвезди како што се Кристијано Роналдо и Жоао Феликс. Под истрага се вкупно 72 договори за 49-мина фудбалери, меѓу кои се и трансферите на Касилјас од Реал во Порто, на Џексон Мартинез од Порто во Атлетико Мадрид, на Нелсон Семедо од Бенфика во Барселона и на Ренато Санчез од Бенфика во Баерн Минхен.