Алжирскиот репрезентативец и играч од средниот ред на Лил, Набил Бенталеб, се врати на фудбалските терени со спектакуларен настап. Тој постигна гол во својот прв официјален натпревар откако во јуни минатата година доживеа срцев удар играјќи мал фудбал.
Поради инцидентот, Бенталеб итно беше опериран и му беше вграден електростимулатор. Во тие моменти, француските медиуми известуваа дека постои голема веројатност никогаш повеќе да не заигра професионален фудбал. Неговиот живот веројатно беше спасен благодарение на брзата реакција на неговите пријатели, кои му правеле масажа на срцето и употребиле дефибрилатор.
Nabil Bentaleb voltou a jogar oito meses após sofrer um ataque cardíaco, marcou um golo decisivo para a vitória do Lille e foi eleito o melhor em campo.
— B24 (@B24PT) February 16, 2025
Futebol. ❤️ pic.twitter.com/KD2VQX4wkW
По повеќе од осум месеци надвор од терените, Фудбалската федерација на Франција му даде дозвола да игра, а Бенталеб го заокружи враќањето на совршен начин – со гол само четири минути по влегувањето во игра како замена во натпреварот меѓу Лил и Рен (2-0).
„Ова беше посебен момент за мене. Поминав пат од тоа да имам сè до моментот кога немав ништо. Знаев дека ќе постигнам гол кога беше изведен корнер“, изјави Бенталеб, кој емотивно го прослави погодокот со трчање кон клупата на Лил, каде што ги прегрна тренерот и соиграчите.
Тренерот на Лил, Бруно Џенезио, беше воодушевен од враќањето на Бенталеб.
„Ова е приказна достојна за филм. Тој го заслужи ова. Јас не верувам во среќа, но тој веруваше во себе. Неверојатна, прекрасна приказна. Тешко е да се опише што значеше тој гол за нас. Ова е момент кој ја одбележува сезоната, кој ќе остане врежан во историјата на клубот и во сеќавањата на Набил“, изјави тренерот на Лил.
