Кошаркарите на Индијана пејсерс победија во првиот натпревар од финалето на Источната конференција на гостински терен против Њујорк никс. По продолжение, натпреварот заврши со резултат 138-135. Клучниот момент се случи на самиот крај од регуларниот дел, кога плејмејкерот на Индијана, Тајрис Халибартон, погоди неверојатен шут за два поени за израмнување 125-125 со звукот на сирената.
Њујорк никс не закрепна од тој шок до крајот, па гостите стигнаа до изненадувачка победа, со што ја поништија предноста на домашниот терен на Њујорк. Халибартон го заврши натпреварот со 31 поен и 11 асистенции, а Арон Несмит исто така блескаше за Индијана со 30 поени и осум погодени тројки од девет обиди.
WHAT A SHOT BY TYRESE HALIBURTON 🤯🤯🤯 https://t.co/8wEwdkeRwZ pic.twitter.com/s497GwRWi9
— NBA (@NBA) May 22, 2025
Екипата на Индијана стана мајстор за чудесни пресврти во овогодишниот плејоф. Против Кливленд направија пресврт иако губеа со седум поени на 46 секунди пред крајот. Против Милвоки исто така победија, иако губеа со седум поени на 40 секунди пред крајот. Синоќа Њујорк водеше со 14 поени три минути пред крајот, но Несмит со своите тројки ја врати Индијана во живот.
„Игравме многу натпревари во кои изгледаше дека противниците ја имаат контролата. Ништо не е готово додека часовникот не покаже нула“, изјави Халибартон по натпреварот.
„Секогаш е забавно да се одигра ваков натпревар. Живееме за вакви моменти“, додаде Несмит.
Кај Њујорк, одличен беше Џејлен Брансон, кој натпреварот го заврши со 43 поени. Карл-Ентони Таунс исто така одигра одличен натпревар, со 35 поени и 12 скока.
Следниот натпревар повторно се игра во „Медисон Сквер гарден“.
