Дербито помеѓу Интер и Фиорентина го отвора шестото коло во Серија А, а кога играат овие два тима, речиси секогаш има победник. На петти јануари годинава, во Фиренца, одиграа 1-1, а претходно, дури на 11 средби по ред секогаш имаше победник.
Последното славје на Фиорентина на „Џузепе Меаца“ беше пред три години, кога славеше со 4-1, а потоа на гостувањата кај Интер губеше со 2-4 и 0-3. На стадионот во Милано, Интер и Фиорентина не одиграле 0-0 повеќе од 20 години, па традицијата најавува тресење на мрежите и убав меч.
Ако освои три бода, Интер ќе ја стигне Фиорентина. „Сино-црните“ последните две победи, со Тотенхем и со Сампдорија, ги извојува со голови по 90-тата минута.
Тренерот Лучијано Спалети, сепак, ќе биде на клупата на „нераѕурите“, откако дисциплинската комисија ја усвои жалбата на Интер. Спалети ќе плати само 5.000 евра. Стратегот беше казнет за непримерен однос кон четвртиот судија на мечот со Сампдорија, иако на снимката се виде дека Спалети не е виновен.
Кај Интер, се враќа Де Вреј, а Миранда ќе биде на клупата. Повреден е Врсаљко. Кај Фиорентина нема повредени, па ќе играат со стандардната формација 4-3-3. Во шпицот на нападот го имаат Џовани Симеоне, син на легендарниот играч на Интер, а сегашен тренер на Атлетико Мадрид, Диего Симеоне.
Пред натпреварот, ќе се одржи мини-церемонија во чест на поранешниот голман Франческо Толдо, кој бранеше за двата клуба.
Денеска слави роденден Карл-Хајнц Румениге, легендарниот германски фудбалер, кој најубавите денови како интернационалец ги мина во Интер, за кого даде 42 гола.
