Новото скапо засилување на Јувентус, Душан Влаховиќ, нема да има мир по потпишувањето за Старата дама. Откако му се налутија фановите на Фиорентина, сега Влаховиќ добива критики и од навивачи на Јуве.
Во јавноста исплива една стара објава на Влаховиќ од пред четири ипол години, во која тој ја слави победата на Реал Мадрид против Јувентус од 4-1, во финалето на Лигата на шампионите.
Влаховиќ објавил слика од Кристијано Роналдо како го прославува голот против Јуве, и напишал: „Да, да, ти. Да живее Кралот“.
Оваа објава од времето кога Влаховиќ уште беше во Партизан, остана во нечија архива, и сега дојде време да ја сподели со светот. Тогаш веројатно Влаховиќ не ни помислуваше дека четири ипол години подоцна ќе стане член на Јуве и ќе го носи дресот со брјот 7, кој пред него го имаше токму неговиот идол Роналдо.
Според бројот на негативни коментари од фанови на Јуве, Влаховиќ ќе треба да бара прошка и да ја заработи нивната љубов со многу голови.