Бруклин нетс немаше проблеми со Бостон селтикс, победи убедливо со 141:126 во меч за НБА историја. За првпат во плејоф-натпревар тројца кошаркари од ист тим постигнаа 104 поени, што е рекорд, а го остварија заедно Дурант, Ирвинг и Харден.
Кевин Дурант беше незадржлив со 42 поени, веднаш до него беше и Кајри Ирвинг со 39 поени и 11 скока, а Харден уфрли 23, но имаше и неверојатни 18 асистенции.
Вкупниот збир на поени на трилингот големи ѕвезди е 104, или најмногу досега во плејоф-натпревар во НБА-лигата.
Кај Бостон, Џејсон Тејтум се обиде да им се спротивстави на расположените гости, но и неговите 40 поени беа малку за успех, па Бруклин поведе со 3:1 и има меч-топка на домашен терен.
Две сет топки пропуштија кошаркарите на Далас против Лос Анџелес клиперс, па сега резултатот е 2:2 во интересната плејоф-серија.
Клиперс губеа со 0:2 по двата порази на домашен терен, но ноќеска по вторпат славеа како гости и израмнија.
Предводени од дуото Ленард и Џорџ, кои искомбинираа 49 поени, но и 19 скока, Клиперс славеа со 106:81.
Лука Дончиќ играше повреден за Далас и запиша црн личен рекорд без погодено слободно фрлање од пет обиди.
Тоа досега не му се случило, а имаше и само една тројка од 7 обиди со вкупно уфрлени 19 поени.
Словенецот беше очигледно фрустриран од добрата одбрана на ривалот, но и од повредата, па реагираше нервозно.
Luka showing his frustrations on the bench 😬 pic.twitter.com/XGx9IwxwsV
— Bleacher Report (@BleacherReport) May 31, 2021
Лос Анџелес клиперс сега повторно ја врати предноста да игра меч повеќе на домашен терен во плејоф-серијата со Далас.