Тркачкиот викенд во Абу Даби, последната станица на актуелната сезона во Формула 1, ќе биде од посебно значење за Шарл Леклер бидејќи на првиот слободен тренинг во петок ќе вози заедно со својот брат Артур. Ова ќе биде првпат во историјата двајца браќа да учествуваат во една Ф1 сесија како тимски колеги.
Дваесет и четиригодишниот Артур ќе го вози болидот на Ферари, кој вообичаено му припаѓа на Карлос Саинц, со што тимот од Маранело ќе ја исполни обврската да им обезбеди две шанси на нови возачи во текот на годината.
Според правилата на ФИА, секој возач мора да го отстапи својот болид за еден слободен тренинг во сезоната на возач кој нема повеќе од два стартa на трки. Шарл претходно своето место му го отстапи на Оливер Беарман во Мексико.
Меѓутоа, откако Беарман ја возеше својата трета Ф1 трка, заменувајќи го болниот Кевин Магнусен во болидот на Хас во Бразил, Ферари мораше да избере друг возач за да ги исполни овие правила.
Затоа болидот SF-24 ќе го вози братот на Шарл, Артур, што ќе биде посебен момент за семејството Леклер, како и историски настан за Ферари и за Формула 1.
Артур минатата година возеше во Формула 2, завршувајќи на 15-тото место во вкупниот поредок, со едно појавување на подиумот во Мелбурн. Оваа година ја помина како развоен возач во Ферари, работејќи на симулаторот во Маранело, како и учествувајќи во Италијанскиот GT шампионат со болидот Ferrari 296 GT3. Дополнително, учествуваше во Европската Ле Ман серија со тимот Панис Рејсинг.
Првиот слободен тренинг на тркачкиот викенд во Абу Даби е закажан за петок, во 10:30 часот по локално време.
