Некогашната пливачка Кирсти Ковентри (41) од Зимбабве е избрана за нов претседател на Интернационалниот олимписки комитет (ИОК) по тајното гласање на состанокот во Грција. Ова е првпат жена да претседава со највисокото спортско раководно тело во светот.
Ковентри е најмладиот од десетте претседатели од основањето на олимпиското раководно тело во 1894 година наваму, како и прва од Африка. Претходно претседател беше Томас Бах кој ја извршуваше функцијата од септември 2013 година и се повлекува по завршувањето на осумгодишниот мандат, кој беше продолжен за дополнителни четири години според прописите на ИОК.
Ковентри беше една од седумте кандидати, а победи уште во првиот круг од гласањето. Таа е поранешна пливачка, освојувачка на златни медали од Олимписките игри во 2004 и 2008 година (на 200 метри грбно) и Светски првенства, а во моментов е и министерка за спорт во Зимбабве.
За време на кампањата, Ковентри вети дека ќе ја прифати технологијата и ќе ги зајакне спортистите, а посебен акцент стави на заштитата на женскиот спорт, поддржувајќи ја целосната забрана на трансродовите жени да се натпреваруваат во женски олимписки спорт.
