По два неуспешни обиди, „трета среќа“ за екипата на Наковски Волеј, која по вистинска драма во пет сета конечно успеа да го освои Купот на Македонија за првпат во својата клупска историја.
Во финалето на Ф4 турнирот во Радовиш, избраничките на Александар Митев ја победија фаворизираната екипа на Јанта Волеј со 3-2 во сетови (16-25, 25-18, 10-25, 25-21, 15-13), и покрај тоа што противникот важи за најдобар тим во сезоната.
Финалето почна според ритамот на Јанта Волеј, првиот сет го добија со убедливи 25-16 и наговестија нов триумф. Но, струмичанки не се поколебаа, се разбудија во вториот сет и со сигурна игра го израмнија резултатот. Следеше нов пад во третата делница, каде Наковски Волеј беше бледа сенка и загуби со 10-25.
Сепак, кога беше најпотребно, повторно се вратија. Четвртиот сет донесе голема борба и одлучност, а Наковски Волеј со одлична завршница успеа да избори сет со тај-брејк.
Во петтиот, решавачки сет, струмичанки стартуваа силно, ја задржаа предноста до самиот крај, и покрај обидите на Јанта Волеј да се врати во игра. Последниот поен донесе ерупција од радост на теренот и трибините, затоа што тоа е историски триумф за Наковски Волеј.
