Лучано Спалети ја предводеше Италија до победа од 2:0 на домашен терен над Молдавија во својот последен натпревар како тренер на Аѕурите. Тренерот на четирикратните светски шампиони беше отпуштен по поразот од 0-3 против Норвешка пред четири дена. Стратегот призна дека направил грешки додека работел за италијанскиот тим.
„Разочаран сум од резултатот, не игравме добро. Ми се даде можност да работам, се обидов, направив грешки, па дури и пробав некои експерименти. Се обидувам да научам сè и каков пристап да изберам. Не сум убеден дека сум најпаметен. Не успеав да го извлечам најдоброто од овие играчи и тоа мора да се земе предвид“, изјави Спалети за медиумите.
Тој го објави своето отпуштање во пресрет на натпреварот против Молдавија. Искусниот тренер помина помалку од две години на позицијата и имаше разочарувачки настап на Евро 2024. Тренерот призна дека не успеал да ги подобри работите.
„Ако се согласите да бидете селектор на репрезентацијата, како што направив јас, тогаш мора да најдете решение. Не можете да се криете зад фактот дека имате малку играчи. Се снајдов лошо и во некоја смисла одлуката е исправна. Не поднесов оставка порано затоа што мислам дека можам подобро. Ја напуштам репрезентацијата каква што ја најдов“, рече Лучано Спалети.
Тој беше прашан дали има некаков совет за неговиот евентуален наследник.
„Се обидов малку да ги поместам работите кога пристигнав, но можеби потоа стана уште полошо. Сфаќаш дали си го направил правилното или не дури подоцна. Работев напорно, се обидов да ја променам ситуацијата. Им посакувам сè најдобро на Федерацијата и на новиот тренер кој ќе пристигне“, заврши Спалети.
