Италија е првиот финалист на Европското првенство по победата на Аѕурите на пенали против Шпанија во вчерашното полуфинале кое се одигра на „Вембли“ во Лондон.
За капитенот на Аѕурите ова беше историски меч, поставувајќи рекорд како единствен фудбалер кој се сретнал петпати против една иста селекција на континенталниот шампионат. Кјелини вчера го одигра петтиот меч во кариерата против Шпанија, а ја запиша само втората победа над Фурија кога се во прашање дуелите на ЕП.
Кјелини беше дел од селекцијата на Италија кога во 2008 година претрпе елиминација од Фуријата на пенали во четвртфиналето, а потоа во 2012 ремизира при 1-1 во првото коло од групите, а подоцна во големото финале претрпи дебакли од 0-4.
На ЕП во 2016 година Кјелини се реваншира со победа од 2-0 во осминафиналето, а вчера славеше по вторпат против Шпанија и воедно се радуваше што по девет години пауза, повторно ќе се бори за европската титула. Овојпат Англија или Данска ќе бидат противници на Кјелини и неговите Аѕури.
