Селекторот на Италија, Роберто Манчини, ќе чека да завршат настапите на екипите од Чизмата во европските купови оваа седмица за да го објави и составот на Аѕурите за дуелот со Македонија, но дел од италијанските медиуми веќе шпекулираат и со стартниот состав за дуелот на „Ренцо Барбера“ во Палермо на 24 март.
Голман ќе биде Џиџи Донарума и покрај големиот кикс што го направи на реванш-дуелот со Реал Мадрид на голот на ПСЖ.
Бекови ќе бидат Џовани ди Лоренцо и Емерсон Палмиери, а можно изненадување ќе биде одлуката на Манчини како стоперски тандем да не настапат Кјелини и Бонучи.
Популарните Кули Близначки беа повредени подолг период, па „Ла Газета дело спорт“ најавува дека е можно тандем стопери да бидат Бастони и Ачерби, или еден од нив да игра со Бонучи, или Кјелини како стартер.
Доменико Берарди е сигурен како десно крило, а уште една дилема на Манлини е дали против Македонија да почне со Лоренцо Инсиње на спротивната страна, или стартер да биде Лоренцо Пелегрини.
Барела, Верати и Жоржињо би требало да бидат во почетната постава како играчи за врска, а нападот ќе го предводи Чиро Имобиле.
Отсутни се Кјеза и Спинацола, кои се стандардни во првиот состав, но поради повреди нема да играат против Македонија.
Најавено е дека Манчини ќе повика дури четворица голмани и 30-мина играчи на поширокиот список што веројатно ќе го објави во четврток или петок.
Една од дилемите е дали на него да бидат Марио Балотели или напаѓачот на Калјари, Жоао Педро, кој неодамна доби италијански пасош.
Можен состав на Италија:
Донарума – Ди Лоренцо, Бонучи (Ачерби), Кјелини (Бастони), Емерсон – Барела, Жоржињо, Верати – Берарди, Имобиле, Пелегрини (Инсиње).
Утре, точно напладне македонскиот селектор Благоја Милевски ќе го објави списокот на репрезентативци на Македонија што ќе патуваат за Палермо на 22 март, за бараж-мечот закажан два дена подоцна, што е прв од двата чекори во баражите за пласман на СП во Катар.
