Хрватска направи едно од највозбудливите враќања во историјата на ракометот и се пласира во полуфиналето на Светското првенство. Коцкестите губеа со 30:26 во 54-тата минута, но до крајот со серија од 5:0 стигнаа до победа од 31:30.
Еден од хероите е голманот Иван Пешиќ, кој се разбрани кога беше најпотребно и не прими ниту еден гол во последните шест минути. Пешиќ одбрани три тешки удари, што им даде дополнителен мотив на неговите соиграчи во нападот да бидат прецизни.
„Верував дека може да направиме пресврт, посебно по првата одбрана што ја имав. По таа одбрана, кај противниците им се зголеми нервозата. Се обидуваат да го „крадат“ времето со долги напади, но не им одеше добро. Ние ја искористивме нашата шанса“, рече Пешиќ.
Интересно е дека 35-годишниот Пешиќ воопшто не требаше да биде дел од хрватската репрезентација на ова Светско првенство. На списокот на селекторот Дагур Сигурдсон беше повикан на местото на Матеј Мандиќ, кој настрада во една несмислена тепачка од соиграчот во екипата на Загреб, Милош Кос. По еден меч, Кос му удри бокс на Мандиќ в лице и го повреди. Голманот мораше да оди на операција, па не успеа да закрепне до стартот на Мундијалот. Затоа Пешиќ беше повикан, а сега во четвртфиналето се покажа како херој.
Пешиќ уште многу одамна е добро познат лик во ракометниот свет, а најмногу се памети по еден немил настан во кој и тој настрада. Во 2009 година, додека играше за тимот на Веспрем во Унгарија, Пешиќ заедно со неколку свои соиграчи беа нападнати пред еден ноќен клуб.
Немилионт настан се случи на 8 февруари 2009 година, кога Пешиќ со тешки повреди беше пренесен во болница (остана без еден бубрег), а неговиот соиграч Маријан Козма почина откако беше избоден со нож директно во срце. Повреден беше и Жарко Шешум, кој имаше нагмеченици на мозокот и фрактура на јаболчната коска на лицето.
„Играчите нормално се однесувале кога биле нападнати од 30-тина млади луѓе. Козма танцувал со својата девојка. Полицијата направи целосна истрага и констатира дека напаѓачите не се од Веспрем“, рече тогашниот претседател на Веспрем, Акош Хунјадфали.
Сведок на тој трагичен настан беше и Марко Вујин. „Ја видов и снимката. Убаво се гледа дека Козма танцува со девојката кога му пристапуваат тројца-четворица и почнуваат да му дофрлаат. Моите колеги беа седум-осуммина, сакаа да избегнат проблем и сакаа да си заминат од клубот. Напаѓачите ги чекаа надвор. Козма е прободен двапати во срцето. Пешиќ, кој трча, е прободен во грбот, а Шешум е удрен откако се обидува да му помогне на Козма да му го извади јазикот надвор од устата за да не се загуши и се обидува да му го спаси животот“, тогаш раскажуваше Вујин во изјава за Блиц.
