Непосакуваното реми со Ерменија дома е веќе заборавено, па фудбалската репрезентација на Македонија е подготвена за викиншка битка против Исланд среде Рејкјавик и резултат каков што досега Рисовите немаат остварено на ова гостување.
Силите се прилично изедначени, како според квотите во Sport Life, така и на хартија, а сега е погодно време за репрезентативците да му ја донесат првата победа на новиот селектор Боби Милевски, кога веќе се испушти шансата за такво нешто пред три дена во Скопје.
Ова ќе биде петти меѓусебен дуел на Исланд и Македонија, во којшто Рисовите ќе се обидат да изборат трет триумф севкупно, односно прв на гости. Нашата селекција на две гостувања во главниот исландски град бележи пораз од 1-0 во 2008 година и реми од 1-1 во 1996 година, што би требало да биде дополнителен мотив за враќањето дома да биде во порасположлива атмосфера. Иако оваа генерација првпат ќе ги одмери силите против Исланд, Македонија памети две домашни победи од 2-0 и 1-0 забележани во 2009 и 1997 година, што значи дека од порано се има победнички рецепт.
За нас е добро што најголемата ѕвезда на противникот, Гилфи Сигурдсон, нема да настапи поради што е суспендиран од фудбалски обврски, а таков хендикеп не смее да се пропушти. Во меѓувреме во нашиот состав се приклучи Кире Марковски по дополнителен повик од селекторот, па нема да биде изненадување доколку добие улога на џокер во средбата.
Дуелот е предвиден да се одигра со почеток во 18 часот.
