Серхио Рамос беше еден од оние кои не сакаа Хулен Лопетеги да добие отказ од Реал Мадрид. Капитенот на Кралскиот клуб веруваше дека мадриѓаните и со Лопетеги може да се врати на победничките патеки, но, сепак, тренерот доби отказ. Како најголем фаворит за наследник на Лопетеги се споменува Антонио Конте. Рамос е најголем противник на идејата италијанскиот стратег да дојде на „Сантијаго Бернабеу“. Токму поради реакцијата и изјавата на Рамос, Реал го стопираше евентуалното доаѓање на Конте и засега е неизвесно дали тоа може да се реализира.
„Почитувањето се стекнува. Не е важно ни името ни ништо друго. Освоивме сè што можеше да се освои со најразлични тренери и на крајот важно е тренерот да се посвети на запознавање со играчите, а не веднаш да се занимава со технички работи. Тренерот не треба да се става себеси пред играчите и нема што да се докажува“, рече Рамос, кој е лут на идејата да биде доведен Конте.
Засега како замена за Лопетеги ќе биде Сантијаго Солари, кој досега го водеше тимот Б на Реал Мадрид.
