Шпанскиот бисер Ламин Јамал, кој на 13 јули ќе наполни 18 години, ќе го добие „највредниот“ дрес во историјата на Барселона, бројот „10“, кој го носеа фудбалски великани како Ривалдо, Роналдињо и, секако, Лионел Меси.
Според информациите на „Мундо Депортиво“, раководството на каталонскиот клуб донело одлука да му ја довери легендарната „десетка“ на Јамал од сезоната 2025/26. Овој потег следува по заминувањето на Ансу Фати на позајмица во Монако, со што дресот со број „10“ повторно остана слободен.
Фати ја доби оваа чест по заминувањето на Меси, но бројот беше „замрзнат“ додека тој беше на позајмица, и клубот не дозволуваше никој друг да го носи. Сега, со новата генерација на сцена, Барселона ја гледа иднината во ликот на Ламин Јамал.
Овој дрес не е само број – тој е симбол на креативност, магија и лидерство. Одлуката да му биде доверен токму на Јамал зборува многу за довербата што клубот ја има во неговиот развој и глобален потенцијал.
