По вториот последовeн пораз во Ла Лига, синоќа од Хетафе со 0-1, Реал Мадрид сега заостанува четири бода зад лидерот Барселона. Овој пад е тежок удар за клубот, особено што само пред две недели го држеше врвот на табелата.
Сега растат сомневањата околу тренерот Алваро Арбелоа, а медиумите веќе шпекулираат дека би можело да се отвори патот за доаѓање на Јирген Клоп.
Назначен во јануари минатата година како замена за Чаби Алонсо, поранешниот дефанзивец не успеа да остави свој печат, а играта на тимот останува под критика. Иако обезбеди место во осминафиналето од Лига на шампионите, тоа сега се чини како слаба утеха.
На Арбелоа му претстои клучен предизвик, дуелите со Манчестер сити во најпрестижното европско натпреварување. Според шпанскиот медиум „АС“, овие средби ќе бидат пресудни за иднината на 43-годишниот стратег.
„Арбелоа ефектот е завршен“, пишува весникот, додавајќи дека ЛШ е последната надеж за тренерот.
Доколку Арбелоа замине, како природен фаворит се издвојува Јирген Клоп. Неговото име одамна се поврзува со желбата на Флорентино Перес за клупата на Реал Мадрид.
Според австрискиот медиум „Салцбургер Нахрихтен“, односите меѓу раководството на Ред Бул и Клоп се напнати. Германскиот стратег веќе не ужива целосна поддршка и се чувствува сè помалку ангажиран на сегашната позиција, со недостиг од работа на теренот.
Со други зборови, сè повеќе се создаваат услови за сценарио за сензационален трансфер на 58-годишниот стручњак во шпанската престолнина во наредните месеци.
