Поранешниот НБА-тренер Џорџ Карл е ново кошаркарско име кое јавно призна дека е импресиониран од игрите што ги прикажува актуелниот МВП во лигата, Никола Јокиќ.
Центарот на Денвер нагетс и сезонава игра фантастично и е лидер во трката за МВП признанието за најкорисен играч во регуларниот дел од сезоната, а сега доби комплименти за игрите што ги прикажува од поранешниот тренер на Сан Антонио спарс, Кливленд кавалирс, Реал Мадрид, Сиетл суперсоникс, Милвоки бакс, Денвер нагетс и Сакраменто кингс.
Карл е импресиониран од игрите на Јокиќ, што ѕвездата на Денвер ја спореди со, за многумина најдобриот кошаркар на сите времиња, Мајкл Џордан, како и со легендарниот центар Шекил О’Нил.
„Го гледам Јокиќ веќе шест сезони и мислам дека најдобра работа што можам да ја кажам за него е дека и понатаму немам идеја како би го чувал, како би играл одбрана против него. Исто сум се чувствувал само со уште двајца кошаркари, Мајкл Џордан и Шекил О’Нил“, напиша Карл на својот профил на „Твитер“.
I’ve been watching Jokic for six seasons now. I think the best thing I can say about him is I still have no idea how I would cover him.
The two other times I’ve felt that was against Michael and Shaq. pic.twitter.com/EPTQ5U4NKe
— George Karl (@CoachKarl22) January 10, 2023
