Далас маверикс загуби и на вториот натпревар во НБА-лигата, на кој ѕвездите Лука Дончиќ и Кајри Ирвинг играа заедно.
Словенецот и новото засилување заедно уфрлија 69 поени, но во последниот напад, при 124-121 за Минесота, беа нерешителни, и си додаваа еден со друг, додека на крај не ја загубија топката. Инаку, на полувремето од овој меч, во салата во Далас се одржа свадбена церемонија.
Демиен Лилард даде 40 поени, од кои 30 во првото полувреме, за победа на Портланд над Лос Анџелес лејкерс од 127-115. Езерџиите со секој пораз се сè подалеку од плејофот, а се покажа дека и трампата со која останаа без Расел Вестбрук не им помогна многу.
Денвер нагетс е прв тим на Западот кој сезонава стигна до 40 победи. Грутките го победија Мајами, а Никола Јокиќ имаше 27 поени, 12 скока и 8 асистенции.
Кливленд има седум победи по ред, најнова жртва им беше Сан Антонио во меч на кој Донован Мичел даде 41 поен. Точно 40 поени постигна Џејлен Брансон, кој беше најзаслужен за победата на Њујорк во градското дерби против Бруклин.
Погледнете како изгледаше последниот напад на Далас кога им требаше тројка против Минесота:
Mavs failed to get a shot off in their final possession pic.twitter.com/69bDL6Xv1D
— Bleacher Report (@BleacherReport) February 14, 2023
