Манчестер јунајтед планира да го продаде Алехандро Гарначо до крајот на јули и веќе активно бара клуб кој ќе го откупи аргентинскиот крилен напаѓач.
Челзи и италијанскиот шампион Наполи се меѓу главните кандидати за неговиот потпис. Причината за оваа одлука е нарушената доверба меѓу Гарначо и менаџерот Рубен Аморим, кој не го гледа како дел од своите планови за следната сезона. Поради тоа, младиот фудбалер е вклучен во групата од петмина играчи кои се надвор од визијата на португалскиот стратег.
Еден од тие играчи, Маркус Рашфорд, веќе го напушти клубот и замина на позајмица во Барселона, а Гарначо изгледа дека е следниот на ред.
Јунајтед постави цена од 60 милиони фунти, но интересот останува голем. Иако има понуди од странство, Гарначо наводно преферира да остане во Премиер лигата, што му дава предност на Челзи во преговорите.
Претсезонската турнеја на Манчестер јунајтед започнува со пријателски натпревар против Вест хем во недела на „МетЛајф“ стадионот во САД.
