Еден од најголемите фудбалери на сите времиња, Диего Армандо Марадона, можел да го облече дресот на Јувентус, Интер или Сампдорија, но трите италијански клуба ја одбиле шансата пред тој да стане легенда на Наполи. Ова го откри Пјерпјало Марино, човекот кој имал важна улога во неговиот трансфер во Италија.
Во интервју за „Радио Серија А“, Марино, кој во тоа време бил најмладиот директор во Серија А, како спортски директор на Авелино, раскажа интересна анегдота поврзана со легендарниот Аргентинец.
„За да го прославиме опстанокот на Авелино во Серија А, организирав пријателски натпревар со Барселона, каде што тогаш играше Марадона. Но, поради несогласувања со раководството на каталонскиот клуб, тој одби да дојде на натпреварот“, рече Марино.
Потоа агентот на ФИФА, Рикардо Фуига, со кого Марино работел на договорот, му предложил да побара клуб од Италија кој би го откупил Марадона.
„Јувентус, Интер и Сампдорија беа единствените клубови кои можеа финансиски да го поднесат трансферот. Ги повикав сите, но сите ме одбија“, изјави Марино.
„Фуига беше шокиран“ и ми рече: ‘Како е можно да нудиме играч како Марадона, а да нема ниту еден клуб што го сака?’“
Марадона тогаш имал 23 години, а во Барселона пристигнал две години претходно од Аргентина. Марино се сетил на Наполи и го повикал спортскиот директор Антонио Џулијано, кој во првиот момент одговорил со „не“. Но, само десет минути подоцна, го повикал назад. Следното утро бил организиран состанок – и останатото е историја.
Марадона го предводеше Наполи до првите две титули во Серија А во историјата на клубот (1987 и 1990), како и до освојување на Купот на УЕФА во 1989 година. Во 257 официјални настапи за клубот постигна 115 голови и 76 асистенции. Денес стадионот на Наполи го носи неговото име, а неговата статуа стои во тунелот кој води до теренот.
