Приказната што ги врзува Јувентус и Нотс каунти е позната, првите дресови на „старата дама“ до 1903 година биле со розевата боја на англискиот клуб, кој му испратил прва гарнитура дресови на италијанскиот шампион, а во таа чест сега најтрофејниот клуб од Чизмата ќе ги менува и основните дресови.
Според „Фути хедлајнс“, портал кој е специјализиран за вести за дресови на фудбалските клубови, Јувентус од следната сезона ќе има пола-пола дресови во познатата варијанта со црно-бели линии, но и со розева нијанса во чест на пријателството со Нотс каунти.
Реакцијата на навивачите во голем процент е негативна, а дел од нив велат дека нема никаква креативност.
„Ме болат очите кога го гледам“, напиша на социлјаните мрежи еден симпатизер на Јувентус, а по него се редат негативни коментари.
„Не, не и не“, коментира уште еден од големата армија навивачи на „старата дама“.
Јувентус веќе имаше комплет дресови во розева варијанта, но тие беа резервни, а сега се менуваат основните бои во „црно-бели“ бои по кои е препознатлив клубот што има над 100 милиони навивачи на целата планета.
Реакцијата на навивачите беше слична и кога на дресот се додаваше симболот на новиот спонзор „Џип“, но сепак, сега некако и се навикнаа на таквата варијанта.
