Jувентус е подготвен сериозно да вложи во својата млада ѕвезда Кенан Јилдиз и ќе му понуди нов долгорочен договор што ќе го задржи во Торино најмалку до 2030 година. Со новата спогодба, турскиот офанзивец ќе добие и значително подобрени финансиски услови, со што клубот јасно ќе покаже колку смета на него во иднина.
И покрај тоа што актуелниот договор му истекува во 2029 година, раководството на Бјанконерите сака навреме да го обезбеди неговиот потпис, наградувајќи го за брзиот подем и одличните настапи во првиот тим. Откако се промовира меѓу сениорите во 2023 година, Јилдиз стана еден од најперспективните фудбалери во клубот и на радарот на неколку европски гиганти.
Во моментов младиот напаѓач заработува околу 1,7 милиони евра по сезона, сума што е далеку под платите на водечките играчи во екипата. Новиот договор, пак, би требало да му донесе годишни примања од околу 6 милиони евра, со можност во иднина да се вброи меѓу најплатените во тимот, особено ако клубот се раздели со Душан Влаховиќ во следниот летен преоден рок.
