Јувентус се пласира во четвртфиналето на Купот на Италија откако убедливо со 6:1 ја победи Салернитана. Мечот не започна добро за Старата дама затоа што гостите постигнаа гол уште во првата минута.
Сепак, тоа воопшто не ги расипа плановите на фаворитот, па Јувентус до крајот на првото полувреме постигна два гола и со предност замина на паузата. Во вториот дел, тимот од Торино успеа уште четири пати да ги израдува домашните фанови и на крајот победи со 6:1.
Јувентус повеќе од една година немаше одиграно меч на кој постигнал повеќе од четири гола, а сега успеа гол-шоуто да го зачини дури со шест погодоци во мрежата на гостите. Следниот ривал на Старата дама ќе биде тимот на Фрозиноне, а во останатите четвртфинални средби ќе играат: Лацио – Рома, Аталанта – Милан и Болоња – Фиорентина.
