Леганес и Реал Мадрид одиграа 1-1 во меч од шпанската лига, кој не му донесе голема радост ниту на едниот, ниту на другиот мадридски тим. Леганес сега има 10 бода плус во однос на зоната на испаѓање, додека немотивираниот Реал падна на четири бода минус во однос на вториот Атлетико.
Домашните поведоа во последната минута од првото полувреме. Стрелецот Џонатан Силва дојде до бројка од три гола сезонава. Леганес е тим кој сезонава на својот терен не загуби од ниту еден од првите шест тима на табелата.
Но, Реал нема пораз на последните 18 лигашки мечеви против мадридските екипи. Реал и Леганес до вечерва никогаш не играле нерешено во меѓусебните дуели, па ова им е сефте да си поделат по еден бод. Реал Мадрид само еднаш сезонава (против Уеска) не прими гол на гостувањата. Последните пет гола за екипата на тренерот Зинедин Зидан ги даде неговиот сонародник Карим Бензема. Французинот ваква серија имаше и пред осум сезони.
Инаку, Реал е клуб кој има играно 4.247 официјални мечеви, а само 35-ти пат играше во понеделник. Реал не играл во понеделник уште од август 2004 наваму.
