Македонската репрезентација ќе има пеколно тешка работа на гостувањето против Данска во полуфиналето на баражот за Светско првенство.
На 26 март 2026 Црвено-жолтите ќе треба да победат тим кој на „Паркен“ во Копенхаген има само два порази во последните четири години и тие порази беа од моќната Шпанија, како и од Хрватска.
Ако се погледне почетниот состав на Данска на гостувањето во Шкотска, кога неколку минути ги делеа од директен пласман на СП, може да се заклучи дека имаат многу посилен и поскап тим од нашиот. Речиси сите им се од клубови од Топ 5 лигите, имаат поединци од Барселона (Кристенсен), Манчестер јунајтед (Доргу), Наполи (Хојлунд), Лацио (Исаксен) и други големи клубови, а и тие што не се од топ лигите, играат за некогашните европски прваци Порто и Селтик или за Спортинг Лисабон, кој е учесник во ЛШ.
На клупата за резерви имаа играч како Кристијан Ериксен, кој сега е во Волфсбург, голманот Јоргенсен од Челзи, Норгард од Арсенал.
Но, надеж може да ни даде ремито 2-2 дома против Белорусија во претпоследното коло, кога си го искомплицираа патот до СП, а со победа ќе беа сигурни учесници.
