Калјари не ги оправда очекувањата во сезоната што заврши, едвај се спаси од испаѓање, иако имаше многу подобар тим од 16-тата позиција на конечната табела, што се потврдува и со интересот на гигантите за играчите на клубот од Сардинија.
Шампионот Интер сака да го купи уругвајскиот репрезентативец Нахитан Нандес и е подготвен во планирана размена на играчи да ги вклучи Раџа Најнголан и Матијас Весино.
За Најнголан дури и би немало преместување бидејќи тој веќе игра за Калјари како позајмен играч од Интер. Весино не е во плановите на новиот тренер на Интер, Симоне Инѕаги, а одигра само 8 меча за шампионот и под команда на Антонио Конте.
И големиот градски ривал на Интер, Милан, сака да пазари кај Калјари во летниот преоден рок, а нивна цел е да го купат романскиот репрезентативец Разван Марин.
Играчот за врска пристигна во Калјари од Ајакс и лани во првата сезона во Серија А одигра дури 37 натпревари и покажа дека е одличен фудбалер, па Росонерите сакаат да го донесат во своите редови.
Марин е стандарден репрезентативец на Романија и одигра цел меч против Македонија во март, кога бевме поразени со 3:2 во Букурешт.
