Н‘голо Канте не само што ѝ е миленик во репрезентацијата на Франција, туку и на сите фудбалски љубители и следбеници на најпопуларниот спорт. Фудбалерот на Челзи едноставно ужива да биде на теренот, како и да се дружи со своите колеги во секоја прилика. За неговата скромност се знае веќе долго време, а со следниот потег уште еднаш покажа зошто е омилен играч на фудбалската јавност.
Имено, денеска „триколорите“ се собраа за претстојните квалификациски натпревари за ЕП 2020 против Молдавија и Исланд, а првиот собир бил закажан во 12 часот. Сепак, Канте одлучил да се појави порано од предвиденото време, па во тренинг-центарот на Франција пристигнал во 6.30 часот наутро.
Канте трпеливо ги чекал да пристигнат останатите репрезентативци, а како што наведе „Л‘Екип“, втор играч кој подранил бил Кингсли Коман, фудбалерот на Баерн Минхен, кој е повикан за првпат по ноември 2017 година, тој пристигнал во 11 часот.
Актуелниот светски првак на 22 март гостува кај селекцијата на Молдавија во премиерниот евроквалификациски меч, а три дена подоцна на националната арена во Париз ќе ја пречека репрезентацијата на Исланд.
