Легендата на италијанскиот фудбал, Фабио Капело, ја критикуваше работата на Пеп Гвардиола во Манчестер сити. Граѓаните се во криза каква што не паметат откако Гвардиола е на нивната клупа, имаат седум порази и само една победа на последните десет меча.
„Гвардиола е одличен тренер, но тој е премногу арогантен и дрзок. Понекогаш дури и губеше трофеи затоа што сакаше да докаже дека тој победува, а не играчите, па ги оставаше клучните играчи на клупа на важни натпревари. Според мене, тој се обидува за себе да ги собере сите заслуги за победите и титулите“, рече Капело.
Со оваа изјава Капело потсети на финалето на Лигата на шампионите од 2021 година, во кое Сити загуби од Челзи, а Гвардиола реши да ги изостави Родри и Фернандињо и на нивно место како последен играч за врска го стави Гундоган, кој не се снаоѓаше добро на таа позиција.
