Репрезентацијата на Англија синоќа ја совлада Австралија со минимални 1-0 во пријателски натпревар на Вембли. Капитенот на “гордиот албион“, Хари Кејн, доби поштеда на овој натпревар, па капитенската лента ја носеше Џордан Хендерсон.
Тој жестоко беше исвиркан од навивачите на Вембли, кои не можат да му го простат трансферот во Саудиска Арабија, односно во екипата на Ал-Етифак каде заработува по 40 милиони евра годишно.
– “Јас навистина не разбирам. Тој е фудбалер со 79 натпревари за Англија, неговата верност и придонесот за репрезентацијата се неверојатни. Неговата улога на теренот и надвор од него е неверојатно важна. Тој е пример за оваа екипа во секоја смисла и заслужува поддршка. Навистина не знам каде води сето ова. Не ми е разумно да му свирите на играч кој дава срце и душа за Англија. Како тоа ќе му помогне на него или на екипата?“ – вели селекторот на Англија, Герет Саутгејт.
Англија во вторник го игра дербито на групата, во која е и Македонија, против репрезентацијата на Италија.
