Во градското дерби меѓу Ливерпул и Евертон во Премиер лигата, Црвените славеа со 1-0 остварувајќи значајна победа во битката за шампионската титула. Со оваа победа, Ливерпул се оддалечи на 12 бода предност во однос на Арсенал на осум кола пред крајот на сезоната.
Натпреварот беше обележан со жестока игра од двете страни, а во фокусот на вниманието се најде грубиот старт на капитенот на Евертон, Џејмс Тарковски, над играчот на Ливерпул, Алексис Мекалистер, во 11-тата минута. Иако многумина сметаа дека Тарковски требаше да добие директен црвен картон, судијата се реши само за жолт.
Инцидентот можеби не влијаеше на конечниот резултат, но предизвика бурни реакции кај навивачите на Ливерпул. Некои од нив отидоа предалеку, упатувајќи навреди, па дури и закани по животот кон Тарковски и неговото семејство. Неговата сопруга, Саманта Тарковски, преку социјалните мрежи ги осуди таквите постапки нагласувајќи дека нејзиниот сопруг, пред сè, е човек, сопруг и татко.
Фудбалскиот клуб Евертон остро реагираше осудувајќи го секој облик на закани и злоупотреба, истакнувајќи дека ќе соработува со социјалните мрежи и надлежните институции доколку се отвори истрага.
На крајот, самиот Тарковски изјави дека веднаш по натпреварот му се извинил на Мекалистер, објаснувајќи дека немал намера да го повреди и дека ситуацијата на теренот била резултат на недоразбирање при борба за топката.
