Фудбалерите на Шкендија го завршија и повеќе од успешниот настап во Лигата на шампионите со убедлив пораз на гостувањето во Баку. Тетовци откако ги елиминираа ТНС и ФЦСБ, со порази од Карабах се селат во плеј-офот од Лигата на Европа, каде за противник ќе го имаат поразениот од двомечот на Ференцварош и Лудогорец.
Карабах на денешниот меч славеше со убедливи 5-1, а победникот беше решен уште во првото полувреме, кога Азербејџанците имаа високи 4-1.
Сепак, Шкендија беше таа која прва поведе и тоа преку Тамба во 10-тата минута, после фантастичното проигрување од Бесарт Ибраими. Радоста траеше само шест минути, бидејќи во 16-тата минута Цаке си постигна автогол и тука како да се срушија сите надежи за македонскиот шампион.
Само две минути подоцна, Карабах веќе дојде во водство преку Кеди, а Акунѕаде во 33-тата и Јанковиќ од пенал во 35-тата зголемија на 3-1, односно 4-1.
Конечните 5-1 ги постави Лендро Андраде во 59-тата минута.
