Менаџерот на Манчестер јунајтед, Мајкл Карик, не беше задоволен по поразот од 1-2 од Њукасл, кој ја прекина неговата одлична низа без пораз на клупата на Црвените ѓаволи. Иако неговиот тим играше со човек повеќе цело второ полувреме, Карик го прифати поразот со филозофски пристап, нагласувајќи дека едноставно не бил добар ден за тимот.
„Не сме задоволни од начинот на којшто игравме. Со оглед на развојот на натпреварот, во голема мера ја држевме контролата, но мораме да им оддадеме признание на Њукасл и на нивниот пристап. Знаевме дека ќе биде тешко, но имавме шанси од кои можевме да надградиме, а не го направивме тоа. Навистина сме разочарани. Проблемот не беше во тоа што тие беа со десетмина играчи, едноставно не игравме доволно добро. Не можеме да бараме оправдувања. Сите носиме одговорност“, изјави Карик.
Тој потоа истакна дека проблемот не лежи во недостаток на карактер кај неговиот тим.
„Станува збор за квалитетот на играта, а не за недостиг на карактер или желба за победа. Лесно е да се донесуваат такви заклучоци само затоа што изгубивме еден натпревар. Њукасл заслужи победа и болно ми е да го кажам тоа. Така стојат работите. Мора да се вратиме на работа и да бидеме подобри за следниот натпревар“, додаде стратегот на Манчестер јунајтед.
