Германскиот голман Лорис Кариус, ќе потпише договор со Шалке 04, откако денеска ги мина лекарските прегледи.
Кариус кој е поранешен чувар на мрежата на Мајнц и Ливерпул, се „прослави“ со двата кикса во финалето на Лигата на шампионите во 2018 година кога како голман на Ливерпул му подари два гола на Реал Мадрид, и од тогаш кариерата му е во надолна линија.
Црвените не му простија и го позајмуваа во Бешикташ и Унион Берлин, потоа Кариус замина во Њукасл за кој имаше само еден настап. Во последните пет години, Кариус има брането на само пет меча. Во слободно време работеше и како диџеј. Сега ќе застане на голот на Шалке кој моментно е 13-ти во втората германска лига.
За разлика од фудбалските терени, на Кариус добро му оди надвор. Тој ја „ќари“ познатата убава италијанска новинарка Дилета Леота која сега му е сопруга и со која имаат дете. Леота сакаше Кариус да брани во Италија за да бидат заедно, но ниту еден тим не беше заинтересиран за него, па мораа да направат компромис, Гелзенкирхен не е толку далеку од северот на Италија и Кариус ќе се обиде да си ја спаси кариерата.
