Ќе има спектакл со многу емоции и интензитет во полуфиналето во Сегментот Д од Лигата на нациите, а противник на Македонија ќе биде Косово.
Предност за Македонија е што се игра еден меч во март 2020 година и ќе бидеме домаќини, најверојатно во Скопје, на националната арена „Филип Втори“.
Косово вечерва го декласира Азербејџан со 4-0 во Приштина и го освои првото место во третата група од Сегментот Д. Успеа да ја претрка Белорусија и таа е треторангираниот победник во четирите групи, па ќе ѝ гостува на Македонија, која е подобра од нив по фазата по групи и го има бројот два, зад Грузијците.
Во второто полуфинале Грузија ќе ѝ биде домаќин на Белорусија, што доведе до интересен развој на настаните и две полуфиналиња меѓу селекции од поранешна Југославија и од екс СССР.
Победниците од полуфиналните дуели во Скопје и во Тбилиси ќе играат меѓусебе во финале, на неутрален терен, за победа која гарантира пласман на Европското првенство во 2020 година.
